Baru salasai Sumbayang Subuah, Mak Apuak bagageh ka lapau. Inyo musti manjarangan aia dan mambuek goreang untuak palanggannyo.
Itu memang kabiasaan Mak Apuak tiok pagi. Indak ado wakatu deknyo untuak bajalan pagi, sarupo jamaah nan lain.
Lapau Mak Apuak memang rami tiok pagi. Hanyo itulah lapau kopi nan ado di kampuang tu.
Di maso dulu banyak lapau kopi di situ, tapi sairiang kamajuan zaman, banyak nan baraliah ka kadai kalontong. Nan lainnyo baraliah manjadi tukang ojek. Dek ulah tukang ojek tu pulo kini ndak ado oplet manambang ka kampuang tu lai.
Karano memang lapau tungga babeleang, tantu urang-urang pangopi indak punyo pilihan lain.
Baru se aia tajarang dan minyak untuak panggoreang ubi alun manggalagak, palanggan Mak Apuak lah mulai tibo surang-surang.
"Alun juo manggalagak aia lai Mak?" Tanyo Udin Kuriak.
"Sabanta lai Din, duduaklah dulu," baleh Mak Apuak dari dapua.
Di balakang Udin Kuriak lah masuak pulo Mak Ican, Bujang Kusuik, Malin Kacindin, Pono Basau, Tan Ameh, dan lainnyo.
Indak mananti lamo, Mak Apuak lah kalua dari dapua mambao kopi untuak palanggannyo. Mak Apuak lah tau bana minuman urang-urang tu. Ado nan pas-pas se gulonyo dan ado pulo nan kurang. Khusus Pono Basau minumnyo kopi paik. Itu karano dulu gaek tu pernah kanai panyakik gulo. (Basambuang)
 
Top