"Indak pai ka Monas, Ncu?" Tanyo Mak Ican.
"Wak tarimo barasiah se lah," jawek Uncu Labai.
"Apo nan tarimo barasiah Ncu?" Salo Bujang Kusuik.
"Iduik an lah tipi tu Puak," uncu indak manjawek tanyo Bujang, tapi manyuruah Mak Apuak maiduik an tipi.
"Cari galombang Monas Puak!" Sorak Ajo Andah.
"Radio nan pakai galombang nyo Jo. Kok tipi pakai canel," semba Pono Basau.
"Ampiang samo tu nyo. Pokok e caghi nan ado siaran dari Monas. Kalau ndak ado, matian tipi tu. Kalau paralu jua ka pasa loak, ganti jo nan pakai gaombang Monas, baa gak ti," sambuang Ajo Andah.
Baitulah ota urang pagi ko di lapau Mak Apuak masalah aksi reuni akbar duo satu duo.
Baa ka baa, urang-urang di lapau tu sapandapek supayo acara bajalan sukses dan aman. Ijan asi gangguan-gangguan. Karano di acara tu bisa mancaliak an agamo Islam itu ciek dan damai.
"Mudah-mudahan indak ado nan mangguntiang dalam lipatan, manangguak di aia karuah," kecek Tan Ameh.
"Nan mode tu Abu Jaha mah," potong Mak Ican.
"Tapi di nagari ko kan memang ado nan takah tu ndak," kato Mak Pono.
"Ado Mak. Dima ado nan elok, pasti ado nan buruak. Sagoni kuini, harum baunnyo kasadonyo, tapi di situ pasti ado nan batambiluak," Mak Apuak lah sato pulo mangaluakan pandapeknyo. (Basambuang)
