S. St. Soeleman

"Sagalo salah, sagalo ndak baiak. Nan batua salah juo. Ado se ilik-ilik dicarinyo," Pono Basau mancaracau surang di lapau Mak Apuak.
Kawan-kawan nan samo duduak lansuang se mamandang heran ka Pono. Baa ka indak, jarang-jarang Pono basikap mode tu.
"Manga Pono, pagi lah mancaracau. Lai ndak tamakan lado kutu tadi malam?" Tanyo Mak Ican.
"Aman Mak!" Baleh Pono.
"Puak, lai ndak paik kopi Pono tadi tu?" Sorak Kari Garejoh.
Mak Apuak nan ditanyo cuma galak manih se. Inyo tau bana kurenah saluruh palanggannyo.
"Dicaliak diparatian, sagalo indak baiak di nagari ko. Sagalo salah se. Nan elok dibuek urang, dek nan lain salah juo," kecek Pono.
"Apo tu Pon?" Tanyo Ajo Andah.
"Cubo caliak dan paratian dek Ajo di tipi. Lah jaleh batua, ado juo nan salah. Nah kalau nan batua lah dikatoan salah, kan kacau tu," jawek Pono.
"Dalam politik biaso tu Pon. Makonyo kok lamah jantuang ijanlah manonton tipi," kato Bujang Kusuik.
"Anggap se lawak-lawak Pon!" Sorak Uncu.
"Kok indak, matian se tipi. Atau jan tonton," kato Kari.
"Bantuak anak-anak lai pulo nampak caro politik kini. Indak galeh inyo se nan dijua, punyo urang nyo galeh juo. Kagiatan urang inyo cikaraui pulo. Antah apo nan ka dipadomani dek rakyaik ko," Pono tambah mancaracau.
"Tambah aia Pono, Puak!" Sorak Kari. (Basambuang)
 
Top