Hari Sabtu, lapau Mak Apuak labiah rami dari biasonyo. Karano banyak pagawai atau urang-urang nan sibuk salamo ko bisa duduak di lapau.
Biasonyo urang-urang tu pagi-pagi lah barangkek karajo. Ado nan bakarajo di kantua-kantua pamarentah, ado guru dan ado lo nan bakarajo di swasta. Nah, hari Sabtu kabanyakan libur.
Di lapau Mak Apuak indak cuma sakadar mangopi, tapi juo maota. Indak beda jo lapau-lapau saisuak nan dijadian bahan ota soal apo sajo. Mulai dari ekonomi, sosial sampai politik tingkek tinggi. Kasadonyo saolah putuih dek ota urang-urang tu.
Pagi ko nan dipaotakan masalah rancana reuni duo satu duo. Karano rancana aksi bisuak tu juo pro kontra.
"Reuni tu biasonyo banostalgia mah ndak Mak," kato Malin Kacindin.
"Iyo. Maota-ota jo kawan nan lah lamo ndak basuo," baleh Mak Apuak sambia malatak an kopi untuak Udin Kuriak.
"Tu baa kok pakai tandingan-tandingan bagai," kecek Malin.
"Biaso tu nyo Lin. Di dunia ko kan sagalo duo. Ado jantan ado batino, ado langik ado bumi, ado rancak ado lo buruak. Kalau ndak ado tandingan tantu ndak lamak bunyi gandang," salo Kari Garejoh mancaliak ka Bujang Kusuik. (Basambuang)
 
Top