S. St. Soeleman

Agak sasak angok Bujang Kusuik masuak ka lapau Mak Apuak. Kawan-kawan nan alah ado di lapau tu nampak tacangang.
"Baa dek sarupo abih dikaja anjiang gilo Jang?" Tanyo Uncu Labai.
"Ampia tarambau den ka banda sabanta ko Ncu," jawek Bujang sambia mintak aia putiah ka Apuak.
"Tarambau baa Jang?" Mak Ican batanyo.
"Ado angkot, sudah mamotong awak, lansuang lo nyo ka kida. Lah tapepe wak deknyo," jawek Bujang.
"Alhamdulillah lai ampia se kan Jang," potong Apuak.
"Di jalan raya kini buliah dikatoan indak ado taratik lai. Sia nan bagak, itulah nan manang. Supir angkot manaiak an jo manurunkan panumpang sumbarang taragak dek nyo se. Indak paduli di tangah jalan bagai. Indak nyo pikian urang lain juo paralu jalan," kato Kari Garejoh.
"Batua Ri. Dulu samaso sikola awak diaja bajalan di sabalah kida. Kini kandaraan banyak nan bajalan di suok. Lah jaleh satu arah, eh ado lo nan manyonsong arus. Iko babayo mah," kecek Mak Ican.
"Ado nan aneh nampak di den. Di Simpang Bagindo Azischan, angkot-angkot nan ka bekok kanan arah Indaruang, justru maambiak lajur kida. Katiko lampu ijau manyalo, inyo basalingkik mamotong. Padohal situ ado polisi lalu lintas. Tapi dibiakan se," Pono Basau lah sato pulo basuaro.
"Nah itu buktk di jalan indak ado taratik lai," semba Kari. (Basambuang)
 
Top