Oleh: S. St. Soeleman

Masalah reuni aksi duo satu duo masih juo manjadi bahan ota dek urang-urang nan minum di lapau Mak Apuak. Malah, tajadi padebatan banyaknyo urang nan sato di aksi tu.
Ado nan mangatoan labiah salapan juta, ado sapuluah juta, tapi ado pulo nan mampakiroan indak sampai sajuta. Pandapek ikolah nan manjadikan lapau Apuak labiah angek.
"Kalau pandapek den, sakitar kurang sajuta," kato Kari Garejoh.
"Buto Kari mah. Sarami itu umaik bakatoan ndak sampai sajuta. Di tipi je dikatoan jutaan," potong Ajo Andah.
"Kok den pakiroan iyo mungkin sampai lapan juta labiah Kari. Karano saluruh jalan di dakek Monas tu panuah sasak dek manusia," kecek Bujang Kusuik.
"Panduduak Jakarta se ndak sampai sabanyak itu doh," kecek Kari baliak.
"Nan datang ka acara tu indak urang Jakarta se doh Ri. Banyak nan datang dari Jawa Barat, Jawa Tengah, Jawa Timur, Jogja, dari Sumatera, Kalimantan, Sulawesi bagai. Bahkan kabanyo dari Sumbar ko banyak pulo nan hadir," Mak Apuak mangecek pulo.
"Bisuak kok ado juo nan takah tu daripado batangka lo awak samo awak, agiah nomor se urang-urang nan tibo bia murah maetong," kato Mak Ican.
"Sangko main bola tu Mak?" Sorak Udin.
Mode tu lah ota di lapau Mak Apuak. Ado-ado se nan dibahas. (Basambuang)
 
Top